البحر أنفو – 04/06/2025 مراكب السردين وتصفية الحسابات.. بين الرزق والتقلاز من تحت الدف متابعة:مع نهاية البياخي، بزاف ديال مراكب السردين كيدخلو فمرحلة حساسة وصعيبة: وهي تصفية لحساب. هاد المرحلة اللي المفروض تكون واضحة وشفافة، وكيخرج منها كل واحد بحقو، ولات اليوم فيها كلام بزاف وشكايات من البحارة وحتى من بعض الربابنة.
كاين مراكب لي داروبياخي زوين بصحتهم، وتصفّى لحساب، وكل واحد خدا نصيبو بلا مشاكل وخرج ليهم لحساب. ولكن هاد النوع قليل، حيث الواقع كيبين أن الأغلبية كتعاني، إما من المراكب ماباعوش مزيان، أو من التلاعب فالديبير، أو حتى من لقوالب ديال اللي كيديروها بعض المجهزين ومالين لكرياج. لحساب ما مخارجش، والبحارة تالفين
عدد كبير من البحارة تفاجؤو فاش مشاو عند مول لحساب، لقاو راسهم ما شايط ليهم والو، ولا خداو أقل من داكشي لي كينتظاروا. كاين اللي قالك داز البياخي كامل فالعذاب، وفي الأخير خدا جوج فرانك ما دارو حتى 50 درهم في المليون، ماعرف حتى واحد كيفاش كيحسبو هاد الناس راه العرق ديال البحار حار بزاف مغادي تديو والو معاكم للقبور أمساخط الواليدين، و كاين حتى اللي قد قد ألولاد ماشاط ليهم والو، وما يمكنش حتى تفرتيتة مكايناش، إوا على الأقل ديرو السلف باش يروحو هاد ليكيباج عند وليداتهم، راه ما يمكنش ثلاثة شهور ديال الخدمة و تمشي عند ولادك طويل ومزال راه سيدنا الله ينصرو دار فينا الخير مكاين الحولي هاد العام، و لكن راه كاين لحوايج ديال الدراري و كاين الكارني ديال لكريدي عند مول الحانوت، و مول الدجاج و عند الخضار، و الضو و الماء بلاما تكلم عليهم..
الديبير والمازوط.. باب كبير ديال لقوالب
المشكل الكبير كيرجع لفوضى فديبير، المصاريف اللي كيحسبوها قبل مايديرو لحساب. كاين اللي كينفخ في الديبير، البالكو مابايعش مزيان و الديبير طالع وكيفاش دارو ليها، واحد لبحري شد الزكاير مع مول لكرياج قاليه أسيدي كاين الديبير مزيان، أنا بغيت السمية ديال كل واحد عطيتيه التدويرة وشحال عطيتيه و سمي ليا بنادم هنا باش نعرفوهم، وكاين لي قبل ما يدير لحساب واخا عارف البيع قليل كيشد المازوط و يحيدو فلحساب، كيخلي البالكو عامر بالمازوط، و البحري مخلصو من تامارة ديالو و الله يخلص، وكاين لي كيدخل مصاريف أخرى في العرام بلا حق و لاقانون غا كترشق ليه، كيبقا يقطع للبحرية
البارتيات كيطيحو من السما وكل واحد كيدير حسابو فراسو
كاين شي ربابنة ماشي كلشي كيديرو لي بغاو يجيبو الفاميلة ديالهم و يزيدوهم في البارتيات، و يزيدو لريوسهم، و من لفوق كيجيبو شي موالين لكرياج مفصلين سبيسيال في هادشي بحال الريزوار، كتلقاه نافخ في الديبير، و نافخ في البارتيات وكيشد ديما التدويرة عند الماريور كلما خواو الحوت داير ليه جطو تما، وكاين موالين لكرياج الله يعمرها سلعة لحساب مفصل ومصفيين خدمة ديالهم، ما تلقا فين تشد الزغبة تبارك الله ولكن أخويا قلال قلال و منعدمين.
البحرية ولامارين.. حل ولا هروب إلى الأمام ؟
لكسايد اللي كتوقع للبحارة خلا بزاف منهم كيشدو لوراق ديالهم نهار لحساب، كيسولو شحال دايرين في المليون، و تما كيفكو مع مول لكرياج، و كاين حتى اللي كيبغي يفك لحساب فلامارين ملي لحساب ما مخارجش، نمشيو لامارين نديرو لحساب ونشوفو داك الديبير منين طاح على البحرية، و دوك البيعات واش كاملين ولا شي هنا شي داز من لهيه، هادي جمل كتتردد بزاف عند الناس اللي تصدمات عند بولحساب.
فين هي الشفافية ؟
المشكل فالأصل راجع لغياب الشفافية و فالمصاريف أي الديبير ،و فطريقة لحسابات كيبقاو يقطعو بزاف ديال مصاريف لي خاص يخلصها الباطرون في العرام مع البحرية، و كاين لي مافهم والو البياخي كلو دوزوه و البحرية قلال و فلحساب البارتيات بالزايد معرفوهم منين خرجوا، داكشي كيديروه شي موالين لكرياج و بعض الرياس، وكاين واحد الباطرون حيد للبحرية 19 مليون في العرام قاليهم ديال البروصي البالكو جاب جيفيني، بعض البحرية مابغاوش هاد اللبق، وقالو ليه جيب لينا باش خلصتي و قطع ثمن البروصي، ماقلنا والو، واخا قانونيا المجهز لي كيخلص الغرامة و المخالفة، وبداو شد ليا نقطع ليك، حتى رد ليهم نص المبلغ عاد تنفسو شوية و البارتيات طلعو.
كاين سبحان الله بعض البالكوات واخا قلال كتسمع الكلام الزين، لحساب خارج مزيان بايعين قليل و دايرين لحساب زوين دوك لي كيخافو الله، و كاين لي مقطعش السلف للبحرية ديالو نهار لحساب، دار معاهم مزيان، و كاين لي مشاط ليهم والو ولا داكشي قليل و دار ليهم السلف باش مايخليش البحرية ديالو بلاش فهاد لعواشر، ولكن البحرية ديالو شادين معاه الستون ديما البالكو فيه ليكيباج كامل، و كاين مراكب لي الرايس مكلف بكولشي كينضي الشغل مزيان مع الباطرون و مع البحرية و كيصفي الأمور مهم بحال هاد النوع قليل إلى لقيتيه عطيني الرقم ديالو باش نصوني ليه واخا غا نتصور معاه، و كاين لي كيطفي التيليفون ديالو عارف القضية حامضة و الضواسا ديالو مافيهم ما يتشاف..
